EduKemya: Edukasyon sa Panahon ng Pandemya (Post Review)

 

Ang edukasyon sa panahon ng pandemya na tinawag na new normal ay talagang isang hamon para sa lahat lalong lalo na sa mga guro at mga estudyante, sari-sari ang reaksyon at opinyon ng lahat. Bilang mag-aaral na nakaranas ng new normal totoong napakahirap ng ganitong klaseng pagbabago sa edukasyon sa simula ngunit sa pagtagal at pag-usad ng panahon ay unti-unti na itong nakasanayan. Wala man sa paaralan ngunit  marami pa din ang kaalaman na aking natutunan hindi lamang sa akademiko pati na rin sa iba’t ibang aspeto. Sa pag-aaral sa tahanan ay natutunan ko ang pagbabalanse ng aking oras sa araw-araw, natutunan kong pagkasyahin ang aking oras sa lahat ng aking mga asignatura at mga gawain pati na rin ang pang araw-araw na gawain sa bahay. Hindi katulad sa paaralan na may sistematikong oras na sinusunod, ang pag-aaral sa tahanan bunsod ng edukasyong new normal ay nangangailangan din ng sariling disiplina na akin din natutunan lalong lalo na sa paggawa ng mga pagsasanay dahil hindi katulad noon na ang mga gawain ay kadalasang ginagawa sa itinakdang oras sa eskwela ang mga pagsasanay na gawain ngayon ay nakasalalay sa disiplina ng mag-aaral. Natutunan ko din ang pagiging responsable sa aking pag-aaral dahil sa limitasyon sa pag-aaral natutunan kong maging responsable sa aking pag-aaral sa pamamagitan ng pananaliksik sa mga bagay na hindi ko gaanong maintindihan hindi katulad noon na lahat ay inaasa sa guro. Sa edukasyong new normal ay hindi din mawawala ang aking pagkatuto sa pag gamit ng mga makabagong aplikasyon sa pag aaral tulad ng mga google meet, zoom, google classroom, google docs at marami pang iba na hindi ko naman ginagamit noon ngunit siya ng pangunahin kong kailangan sa pag-aaral ngayon. Natutunan ko din ang paggamit sa iba’t ibang teknolohiya bukod sa celphone.Sa edukasyon ng new normal ko din nalinang ang aking kakayahan sa visual arts dahil sa iba’t ibang pagsasanay na ginagamitan ng brochure, report, komiks at iba pa. Sa pag-aaral sa new normal marami din akong nadiskubre sa aking sarili. Isa sa mga nadiskubre ko sa aking sarili ay mas nakakapag-aral ako sa gabi kaysa sa umaga. Nadiskubre ko din sa aking sarili na mas epektibo sa aking pag-aaral ang paggamit ng mga kulay o highlighter, sa paggamit nito ay mas natatandaan ko ang aking inaaral kaysa noon na powerpoint ang aking kadalasang ginagamit sa pag-aaral. 

 

                           

                           Mahirap man sa simula pero sa aking pag aanalisa sa mga bagay na aking natutunan, nalinang at nadiskubre sa aking sarili noong panahon ng pandemya ay talaga namang nakamamangha dahil ngayon ko lang nakita na hindi naman nauwi sa wala ang bagong metodo sa pag-aaral na umusbong dahil sa panahon ng pandemya. Hindi man ito ang ating nakasanayan sa pag-aaral ngunit hindi na din naman masama dahil napakarami ko rin namang natutunan bukod sa akademiko ay may natutunan din ako sa  iba’t ibang aspeto ng buhay na hindi ko matututuhan sa tradisyonal na paraan ng pag-aaral. Hindi na rin masama ang makabagong edukasyon na ginagawang alternatibo sa panahong kasagsagan ng pandemya kaysa naman matigil ang mga mag-aaral sa pag-aaral. Tulad nga ng sabi nila hindi naman tayo hihintayin ng mundo, patuloy ito sa pag-ikot kahit nakatigil tayo.