Wikang Filipino: Wikang Koreano?

            

Bawat bansa ay may kanya-kanyang natatanging wika, bawat wika ay may sariling pagkakakilanlan. Sa panahon ng teknolohiya makikita ang bakas ng paglawak ng globalisasyon. Sa pamumukadkad ng pandaigdigang interaksyon sa iba’t ibang panig ng mundo, ang komunikasyon ay itinuturing na kasangkapan sa pakikipagtalastasan. Pinaka makapangyarihan ang wika hindi lamang sa komunikasyon,  maging sa pagpapalawig ng ekonomiya, interpersonal na pakinabang, akademiko at marami pang iba. Sa lumalagong pagkakasundo ng iba’t ibang bansa ang pag aaral ng wika ng iba’t ibang bansa ay naging normal at hindi dito namumukod ang Pilipinas. Ang pag-aaral ng Ingles ay kasama sa kurikulum ng Pilipinas bukod dito ay marami pang wika ang gustong pag-aralan lalo na ng mga kabataan isa na dito ang wika ng mga koreano.  Dahil sa paglaganap ng korean pop o mas kilala bilang kpop marami ang mga kabataan na nahuhumaling hindi lamang sa mga grupo ng mga korean artist ngunit maging sa kanilang kultura, uri ng pamumuhay at maging sa wika. Ayon sa isang artikulo ng philstar ay pang lima ang Pilipinas sa masugid na tagahanga ng k-pop.

Napakaraming kabataan ang nag aasam na matuto ng wikang koreano, iba’t ibang tutorial sa internet ang paulit-ulit na pinapanood ng mga kabataan upang wikang koreano ay matutunan. Ngunit dapat pa nga bang ituro ang wikang Koreano? Ang pagtuturo sa kolehiyo ng wikang koreano ay ikatutuwa ng marami ngunit hindi ba at mas maganda kung pagyamanin muna natin ang sariling atin bago ang sa iba? Mayo taon ng 2019 ng isa batas ang pagtanggal ng pag aaral sa wikang Filipino sa kolehiyo, hindi ba at napaka laki namang insulto hindi lamang sa ating pagka pilipino ngunit maging sa kabuuan ng bansa na pag aralan ang wikang banyaga kaysa sa sarili nating wika? Ang pagtuturo ng wikang Koreano ay maganda ngunit hindi ba dapat ay unahin muna natin ang atin kaysa ang sa iba? Sa panahon ngayon na katatapos lang ng pandemya, ang mga kabataan ay halos hindi pa matapos sa panonood at pagtangkilik sa kdrama at kpop dahil dito ay paniguradong ang sarili nating lenggwahe ay mangungulelat na naman sa mga kabataan kaya nararapat lamang na kung ang pag-uusapan ay akademya ay isantabi muna natin ang ibang lenggwahe at hasain ang atin.   Ang ating wika ang higit na dapat nating pagyamanin muna kaysa ang iba pang wika. Maaaring sinasabi ng iba na hindi na kailangan aralin ang wikang Filipino dahil alam na naman natin ang pag gamit sa ating sariling wika ngunit ito ay walang katotohanan. Iba ang pag gamit ng wika sa pananalita at sa paggamit nito sa wasto at pormal na paraan. Sa pag alis pa ng wikang Filipino sa kolehiyo inaalis nito ang karapatan ng mga kabataang Pilipino sa wastong pagkilala sa sariling wika. Ang bansa natin ay Pilipinas hindi Amerika o Korea kaya higit sa lahat dapat pagyamanin natin ang ating sariling wika hindi ang wika ng ibang bansa.

Ang pag-aaral ng iba pang wika ay isa ring kalakasan, magandang oportunidad din ang hatid nito para sa atin lalo na sa lumalaganap na globalisasyon ngayon sa buong mundo ngunit tandaan natin na ang wika ay sumasagisag sa pagkakakilanlan ng isang bansa, ang pagpapayaman ng ating wika ay ating tungkulin natin sa ating bansa. Sinasalamin din ng wika ang ating kultura at paniniwala. Mahalin muna natin ang sariling wika, pagyamanin ito at ipagmalaki bago tayo mag aral ng iba pang wika. Bigyan pa ng pagpapahalaga sapagkat ito ay atin at ang nagbibigay pagkakakilanlan sa atin. Ito ay ating itaguyod at pagyamanin hanggang sa susunod na henerasyon, ang wikang nagmula sa atin ang dapat inuuna kaysa sa wikang banyaga. Kung hindi natin pagyayamanin ang sarili nating wika wala ng iba pang magmamalasakit.